كتبت:ريهام طارق
يروي المخرج احمد مدحت الايام الاخيره من حياه الفنان الكبير الراحل هشام سليم وقال:"بعد ما رجعت من السفر ماكنتش شفت هشام لكن كنا بنتكلم و في يوم كلمت فيدرا و عاتبتني عشان ماسألتش عليها من ساعة ما رجعت!! و قالتلي ان الدكاترة وقفوا الكيماوي و ده مؤشر خطير معناه ان الجسم بطل يستجيب !! و اتفقنا ان احنا نتقابل عنده في مستشفي دار الفؤاد .
رحت أنا و أيمن أخويا الغرفة ١٢٢٥، استوقفني رقم الغرفة لأن التاريخ ده ليه عندي معني عشان بناتي مولودين يوم ٢٥ شهر ١٢ ، فتحولنا نور و قسمت ولاده و أنا كنت خسيت حبة كويسين أول لما شافني هشام قالي برافو عليك يابو حميد انت خسيت قلت في عقل بالي إنت في إيه و لا في إيه !! و رحت أحضنه و خفت يتفرفت في ايدي، كان خس جامد جدا و التعب باين عليه لكن ضحكته زي ما هي و فرحته بينا مخليه روحه حلوة ولما سألته عامل ايه كالعادة ماشتكاش و لا اتكلم عن الوجع و لا الألم و كل دي طبعا دروس مستفادة الواحد بيتعلم منها غير إنه لمحلي إن ربنا يرحم الناس الغلابة من المرض اللعين ده من غير ما يدخل في تفاصيل و كان يقصد إن علاجه مكلف . بعدها فيدرا جت و فتحت الستاير و النور ملأ الأوضة و عملت شاي و كالعادة H نكش في ايمن و ايمن قاله ايه رأيك نجيب أكل من ماكدونالدز لكن هو ماكانش ليه نفس ياكل. قلتله انا اليومين دول قبل ما نام باسند ضهري علي السرير و اغمض عيني و اسمع مزيكا و بتفرق معايا اوي قالي انا قبل ما نام باشغل قرآن، شوية كده و استأذنت عشان أمشي و قالولي خليك شوية بس الصراحة ماكنتش قادر استحمل أشوفه كده و المفروض انه كان خلاص بعدها بيومين ح يسيب المستشفي و يروح البيت و كنا بنتكلم في السرير الطبي و الممرضة و نجيب واحده و لا اتنين لكن نور ابنه كان محضر و متفق علي كل حاجة و اتفقنا ان احنا نتقابل عنده في البيت ، الكلام ده تقريبا كان قبل وفاته ب ٦ ايام .
يوم ٢٢ سبتمبر الساعة ٩ و نص صباحا قال للي حواليه ( عيلته .. ولاده و خالد و يسرا و فيدرا و بعض الأصدقاء المقربين ) اللي كانوا موجودين معاه انا باموت .. قالوله قول الشهادة قالها و ابتسم و الساعة ١٠ و ٦ دقايق توفي هشام سليم، رحناله انا و ايمن و هيثم كرم البيت لقينا العيلة و صحابه المقربين وولاده طبعا و كانت حالتهم صعبة و احمد زيتون مدير التصوير هو اللي غسله مع المغسلين .
تم دفن هشام بمقابر اكتوبر بطريق الواحات و الحمد لله دفنته انا و زيتون و ابنه نور و طارق النهري و الفنان خالد عبد السلام و الفنان اشرف عبد الباقي و سلامة المساعد بتاعه و يمكن حد او اتنين كمان .
أخيرا هشام كان شخص إبن أصول بسيط كان ممثل ماكانش تاجر مشاعر !! و كان يحب يعيش في هدوء اختلفنا كتير حوالين حاجات لكن هو كان يصر علي رأيه و يعلنه و مش من منطلق رياء أو نفاق و لكنه كان مقتنع بيه و في مواقف اخري كنت باحسده علي صراحته و شجاعته في بعض المواقف سواء الشخصية او العامة.
الصداقة في السراء و الضراء مش لما الواحد يبقي منور الناس تبقي حواليه و لو انطفي او تعثر او مرض الناس ينفضوا من حوله، و اللي عملته فيدرا مع هشام سليم يستاهل الاشادة و لازم كلنا نتعلم منه معني الصداقة الحقيقي .
0 التعليقات :
إرسال تعليق