ماتتكلمش عن جرحك
وخد نفسك وعيش بكرة
ده ويا الحلم اريحلك
وحب النور بلاش تكره
ماهى الدنيا مجرد دور
وليك فرصة حسب ماتدور
ولو خابت وايه يعنى
ده عود الخيمة لو مكسور
ماهو منك ومن فعلك
ده زرع الارض طرحه جدور
وايد تعبت تنوب عنك
خلقنا الله سواسية
على خط الحياة واقفين
ماقلش الدنيا دى وسية
ولاتفرط فى دنيا ودين
كتبلك كل ماشفته
وعشت الجرح وعرفته
ماتتعلم فى يوم مرة
وليه اسمك مع التاهين
عشان انت نسيت ربك
وبعت الحلم مجانى
ربطت الحلم على قلبك
وواقف تشكى وتعانى
ماتاخد عبرة من غيرك
وشوف السكة رايحة لفين
بلاش تخطأ فى تقديرك
وترمى عالبلاوى طين
حلمت كتير وراح حلمك
فى قلب الوهم والمجهول
ياتتحمل قرار جهلك
ياتبقى فى دنيتك مقتول
بلاش تندب من الساعة
وتفتح الف بلاعة
تخلى الفقر شماعة
وانت الجانى والمسئول
ياريت اتفضل اتوضي
وصلى الفرض من قلبك
وتدعى كتير عشان ترضى
وتهزم كل من ضلك
مابين الرب وعباده
حاجات حلوة بتغنينا
يغور الوهم وبلاده
وكل شيطان بيغرينا
وعمر الفقر ماكان عيب
ولا خاف الاصيل م الديب
لكن العيب وكل العيب
نقول عاالفرح مش لينا
===========
#احمد_قدري
#
0 التعليقات :
إرسال تعليق