في بعض الاوقات بتجيلي استشارات من سيدات كتير وهي بتبكي بكاء حاااار وبتردد العبارة دي
أنا هتجنن ....
انا قدمت لشريك حياتي كل الحب والإهتمام ..
والنتيجة .. للاسف زيرو !!
ليه؟؟
عمل معايا كده ليه؟؟؟
مش همشي الا لما تقوليلي
الحقيقة
في الاول كنت بنزعج لحالتها وببقي عايزة اهديها وبعدين ابتدي معاها في رحلة الحل
لكن بعد خبرة وممارسة وجلسات كتير وصلت لاني كنت بضيع وقتها ووقتي وبحتاج مجهود كبير بعد كده علشان اوصلها انها تكتشف الحل وتدرك الحقيقة
ومن هنا عدلت الاستراتيجية وبقيت امشي معاها خطوة خطوة
خلونى الأول أعدّل الجملة الشهيرة اللي دايما بتتردد عليه ....
{ انا اديته كل الحب والاهتمام اللي ممكن واحده تقدمه لواحد }
للجملة دي
إنتي قدمتي لشريك حياتك كل الحب والإهتمام .. ( بطريقتك إنتي مش زي ما هو كان عايز يتحب ويهتم بيه )
كنتي بتعمليله الأكل الصحى .. بس هو عايز مرة محشي ومرة مكرونة بالباشميل وكل الأكل ( الفظيع ) ده بغض النظر عن إنك خايفة عليه وعلي ضغطه وصحته ووزنه والذي منه ..
انا كنت مهتمية جدا بمذاكرة وصحة ونضافة ولاده .. بس هو كان نفسه إنك كنتي تهتمي بأفكارهم ومشاعرهم وكلامهم عن نفسهم وتقديرهم لذاتهم ...
كنت بهتم اوي إن البيت دايما يكون نضيف .. بس هو كان نفسه ان البيت يكون سعيد وضحكتك ماليه وشك مش طول ما انتي قاعدة عامله حظر تجول لكل اللي في البيت علشان هيتبهدل وتعبك هيروح علي الفاضي ده غير معزوفة مش قادرة ضهري ورجلي وأه مبتنتهيش ..
انا والله كنت دايما بسمعه علشان اطمن على أخباره ..
بس هو كان نفسه تسمعيه علشان تفهميه وتحسي بيه .. كنت دايما بهتم بعلاقتنا" الخاصة " فى المناسبات والأعياد والعطل الرسمية علشان عنده شغل ومكنتش بحب أأثر علي شغله ..
وهو كان نفسه يحس بلهفتك عليه طول الوقت وأى وقت 😉
انا كنت بحط أفخر ماركات الميكاب والبارفانااات..
مع انه قالك اكتر من مرة انه بيحب شكلك الطبيعى ..
نصيحتي لكل واحدة وأي واحدة
لو بتقدمى الحب بطريقتك وبس مش هيوصل للطرف التاني ..
هتبقو إنتو الاتنين مش مرتاحين ..
انتى بتعملى مجهود فى إتجاه غلط وهو مستنى منك حب بشكل محدد يفهمه ويسعده ..
كل واحدة تراجع نفسها وهتكتشف
انكم محتاجين تتقابلو فى نقطة حقيقية ...
مش كده ولا إيه.
0 التعليقات :
إرسال تعليق