يعني ايه تكوني أم وأب ؟؟

بقلم/هناء يسرى
 لما تكوني الام والاب ف نفس الوقت أنتى اللي تزعقي وتشدي ،وانتى بردو اللي تطبطبي وتحني .

انتى اللي لازم تتحملي لأقصى درجه ويبقي عندك أطول نفس، انتى اللي تجري علي الدكاترة وممكن برضه تنزلي ف نص الليل لمستشفى. انتى اللي لازم تحسسيهم أن الدنيا أمان، وان مفيش مخلوق هيقرب ليهم. انتى اللي دايما بتتسئلي وتتلامي وتتحاسبي! أنتى اللي بتربي وتقرري وتفكري.

أنتى اللي بتتخني صوتك في أوقات الجد وانتى لازم تركزي ف مستقبلك وشغلك وحياتك وتدوري تاخدى كورس عشان تربيهم تربيه سوية بدون كلاكيع ومشاكل.

  الموضوع صعب اوى "لكن" انتى اللي بيصحوا كل يوم الصبح يدورا عليكي انتى اللي بتسمعى ضحكتهم،  انتى اللي بيجروا عليكي ف أي وقت انتى اللي بتسمعى أول كلامهم.. اول تصرفاتهم.. اول مواقفهم انتى أقرب حد عارف كل تفاصيلهم اللي بيحبوا واللي بيكرهوه انتى اكتر حد فاهم هما محتاجين ايه انتى اللي بيترموا ف حضنك كل يوم بليل ويتخانقوا مين هيكون ف حضنك انتى أقرب نفس.. أقرب حضن.. احن حد.. ومصدر الأمان الكامل انا شيفاها منتهي العدل.. ومنتهي الراحة.. برغم الصعوبات اللي كنت بحسها ف الأول.. لكن حقيقى.. انا واخدة حقي جدا في حجات لا بتتشري بالفلوس ولا بتتعوض مع الوقت وراضية بيها جدا لكل single mom ولكل أم شايلة المسئولية كاملة.. إنتي ربنا اعطاكي ووهبك نعمة ونور وطاقة من ولادك ربنا يجعلهم نور لطريق منور بيكى و بيهم❤

شاركه

عن Mizoohanaa

عالم العلم والمعرفة