بقلم . ليمي سعيد
في كل لحظة فحياتي بفكر فالموضوع ده و ده اسمه التدبر و التدبر عبادة مهمة من العبادات لأنك بتوصل لمرحلة من التسليم الكلي و الإيمان المطلق و بتطبق ده في كل حياتك . الرزق بفكر فيه من منظوره الشامل بمعني انك من أول ما بنفتح عيوننا الصبح أنا شايفه إننا مبنعرفش أى حاجه هتحصل بعد كده وإيه رزق اليوم بكل تفاصيله وعلشان كده انا اخر واحدة ممكن تديلك خطط مؤكده مش لبكرة و الأسبوع الجاى لأ النهاردة ولبعد ساعه يمكن بنجتهد وبنحاول نحدد حاجات ومواعيد وتصرفات بس طبعأ اللي رايده ربنا هو اللي بيكون و أحيان كتير بندهش من اللي بيحصل .مثلأ تصحي ناوى تنزل تلاقي نفسك جالك تليفون نزلت حته تانيه خالص و فنص الطريق مكتوبلك تشرب بق ميه من مكان تالت ووانت راجع يطلعلك مشوار تانى فحته تانية خالص يكونلك فيها لقمة رزق ولو حد كان حكالك أمبارح إن ده هيحصل إنهارده كنت قلت عليه مجنون . قيس علي كده شغلك تبقي متخرج من حاجه و تدور الأيام تلاقي نفسك في حتة تانية خالص . و عن حواديت الزواج و النصيب ورزقك فين ومع مين تسمع وتشوف حاجات تقف قدامها مبلم مين فين وإزى وأمتى ناس من الشرق وناس من الغرب . كل دى أرزاق مكتوبالك مفيش قوة علي وش الأرض تقدر تمنعها عنك ولا بشطارتك ولا بنصاحتك ولا بأي حاجه انت بس مجرد بتسعي وبس الباقي ملكش فيه .ممكن لقمة تبقي بتحطها فبقك وتقع عالارض ملكش نصيب فيها تيجي قطه معينه مكتوبالها تأكلها ده ممكن تدخل جوفك فعلا و متبقاش نصيبك تبلعها . تبقي ماشي علي طريق سفر تنزل ريست تشترى لقمه . هدمة .أى حاجه فى مكان انت نفسك متعرفهوش و لا عمرك رحته رزق المحل ده بالذات دونأ عن غيره . واحد مسافر بره مامته بعتاله اكله بيحبها مع واحد تانى يزوره فنفس التوقيت واحد تالت من بلد تانيه خالص علشان نصيبه ياكل منها . واحده من بلد اتجوزت واح
من بلد تانيه خالص وجمع بينهم حب بمحض الصدفه . اتنين عرفوا بعض بحدوتة غريبه و بقوا رزق بعض فالأخر و قيسوا علي كده انا بس من حياتى اكتب مجلدات عن غرائب الرزق وكل واحد فينا كده . احنا مش قدامنا غير السعي والتسليم والدعاء بأن يكتب الله لنا الخير دومأ پأن الرزاق هو الله و أنها أنفاس معدودة في أماكن محدودة فأنا أريد وأنت تريد والله يفعل ما يريد وده بيخليني بفكر كده مع كل موقف بيحصلي و كل يوم بليل استرجع اليوم والاقيه أغرب من اليوم اللي قبله. بس دايمأ بلاقي أن ربنا سبب الأسباب ليا علشان يديني هدية من عنده. وحتى لو رزقني تعب معين فمكان معين و ده منعنى من مشوار معين فده رزق لأنه له حكمه انا معرفهاش .رزقنى مشكلة تبوظ شغل معين علشان يطلع من المشكله حل احسن من الاولانى وشغل أفضل فى مكان أفضل . يمكن كتير ببقي مش عارفه سبب اللي بيحصل غير بعدها بعرف أن ربنا كاتبلي رزق حلو فناس حلوة و مواقف حلوة و أماكن حلوة و شغل حلو و ده بيأكدلى أن الحمد لله ربنا بيحبني و عارف انا قد إيه بحبه الحمد لله حمداً كثيرأ مباركاً و يوم ما بيمنع عنى حاجه بعرف أنها مش رزقي ولو اتنططت مش هاخدها فمبزعلش و الله ما خلقنا ليحرمنا بالعكس ربنا هيراضينا فوق ما نتخيل بس تيقنوا بكرمه .أحمدوا الله وأشكروه علي رزقه في كل شئ فمن حمده زاده. وأوعى فوسط كل ده تنسي تزكى عن رزقك ده حتى لو قليل لأنه من عند الله ولوجه الله ومحدش يجى يقوللى انا ربنا ناسيني و تعبان قوى ومفيش رزق لأنه كده هيبقي جاحد في حاجة اسمها الأرزاق المنسية أبوك رزق وأمك رزق وأخواتك رزق زوجك الحنين الفرفوش رزق زوجتك الحنينه الفرفوشه رزق ولادك اللي بيحبوك رزق صحابك اللي بيحبولك الخير رزق إنك تلاقي حد يدعيلك فصلاته رزق إنك تلاقي سند في المصايب قبل الفرح رزق إنك تلاقي اللي ما تهونش عليه دمعتك ولا تعبك رزق إنك تكون منتظم في صلاتك وعباداتك رزق نومتك المرتاحه و راحة بالك رزق .اللمة في بيتك الهادى وسط ولادك رزق إن يكون عندك إيدين ورجلين وحواس إنك مش عيان إن الناس بتحبك ماهو حب الناس رزق كل الأرزاق دى عندك وغيرك محروم منها و أحيان كتير ربنا بيبتليك فالرزق علشان يشوف رد فعلك و يحاسبك عليه إما يرضي عنك أو يغضب عليك اكتر فمن قلب المحنة تأتى المنحة وربنا بيبعت البلاء ومعه اللطف من عنده اللهم لا نسألك رد القضاء ولكن نسألك اللطف فيه وده كان واضح فالأية الكريمة ( فأما الإنسان إذا ما إبتلاه ربه فأكرمة ونعمه فيقول ربي أكرمنِ .وأما إذا ما إبتلاه فقدر عليه رزقه فيقول ربي أهانني) سورة الفجر الأيات من (١٦.١٤). أحمدوا الله و اشكروه زادنا الله من رزقه و بركاته في كل شئ.
0 التعليقات :
إرسال تعليق