غلبت معاك بقلم / سامية السيد

.....
عشقت الحب من حبك
عشقت الدنيا في وجودك
ومدتلك ايدين عاشقة
بتستنى مداد خيرك
لكن خيرك ماهوش لية
واطلب منك الكلمة مغموسة
في فتات رحمة
بترميني بميتين كلمة بتكويني
انا مليت من الأعذار
وقلبي معاك غلب واحتار
اناديلك تقولي معاك
و احكيلك هموم ويلي
تجيني بكلمة تإذيني
تكون فرحان!!!
اقصقصلك جناحاتي
واعيش جواك يا ملاكي
تقولي خديني ضميني
واقول الضمة تحييني
لا الاقي حضن ولا ضمة
ولا كلمة بتشفي جراح وترضيني
تعبت معاك!
اقول دة ملاك
اهي غًُمة
ونرجع تاني للمة
واقول عاشقاك
مانيش قادر في يوم انساك
ماهو انت اصلك الضحكة اللي بتنور طريقي معاك
ماهو انت اصلك الدمعة اللي بتشق الأمل وياك
غلبت معاك
مانيش فاهماك
حبيبي انت؟؟
ولا.. ألم ساكن
يهد الروح
حبيبي انت؟؟
ولا.. سحاب عاشق
لرسم جروح
باحبك..
كلمة ساكناني منين ماتروح
الف الكون وارجعلك وكلي حنين
ومشتاقة لحنين وصلك بقالي سنين
الاقي العند والحيرة
محاوطني
وشكك فية والغيرة
ملازمني
انا مليت
غلبت معاك
مانيش فاهماك
تقول اسف مانيش قاصد
اقول مش هابقى انا راصد
واعدي آساك
تقولي الضحكة من عينك
بتحييني
 واقول عاشقاك
وترجع تاني تسقيني مرار القول
وترمي الكلمة تإذيني
وانا المسئول
عشان رايداك
مانا صابر  عشان بهواك
..
خلاص الصبر فاق حده
وزهق الصبر من مده

باحبك كلمة ساكناني
 منين ماتروح
هقولها واعيدها من تاني
 وكلي جروح
واسجل كل دقاتي..
 وادفن كل آهاتي
ف كتاب مجروح....
......
سامية سيد

شاركه

عن احمدعبدالكريم

عالم العلم والمعرفة